🗳️ “मतदारयादीतील घोळ तात्काळ दुरुस्त करा! — उमरखेडात नागरिकांचा संताप”

✅ एमडीएफकडून उपविभागीय अधिकाऱ्यांना निवेदन : पारदर्शक निवडणुकीसाठी ठोस मागण्या

उमरखेड :
उमरखेड नगरपरिषद निवडणुकीच्या पार्श्वभूमीवर प्रसिद्ध झालेल्या प्रारूप मतदार यादीत मोठ्या प्रमाणावर चुका व विसंगती आढळून आल्याने शहरात संतापाची लाट उसळली आहे. अनेक पात्र मतदारांची नावे यादीतून वगळल्याने नागरिकांमध्ये तीव्र नाराजी व्यक्त होत आहे.

या पार्श्वभूमीवर महाराष्ट्र डेमोक्रॅटिक फोरम (एमडीएफ) तर्फे मुख्य निवडणूक आयोग, जिल्हाधिकारी, उपविभागीय अधिकारी व नगरपरिषदेचे मुख्य अधिकारी यांना निवेदन देण्यात आले. या निवेदनात नगरपरिषद क्षेत्रातील मतदारयादीचे तात्काळ पुनर्निरीक्षण करण्याची मागणी करण्यात आली.

एमडीएफच्या निवेदनातील प्रमुख मागण्या पुढीलप्रमाणे —

प्रारूप मतदार यादीचे पुनरनिरीक्षण करून सर्व चुका दुरुस्त कराव्यात.

मतदारांच्या तक्रारींसाठी विशेष हेल्पडेस्क किंवा तक्रार निवारण केंद्र स्थापन करावे.

ज्यांच्या नावांचा समावेश यादीतून वगळला आहे, अशा नागरिकांना नावे समाविष्ट करण्यासाठी अतिरिक्त संधी द्यावी.

संबंधित निवडणूक अधिकाऱ्यांकडून अंतर्गत चौकशी करून जबाबदारी निश्चित करावी.

दोषी कर्मचाऱ्यांना तात्काळ निलंबित / बडतर्फ करावे.

एमडीएफचे संयोजक फिरोज अन्सारी, साकी इकबाल, मोहसीन राज मोहम्मद, शहीद इकबाल, जावेद मंसूरी, मोहम्मद साबीर, साहेब रफिक, फुरकान खान, शेख नदीम, अश्फाक अली, सोहेल खान, मनोहर खान, मोहम्मद खान, कलीम राज, मिनाज अहमद, शेख सलीम, तसलीम अहमद आदींच्या उपस्थितीत हे निवेदन उपविभागीय अधिकारी सखाराम मुळे यांना देण्यात आले.

निवेदनादरम्यान नागरिकांनी स्पष्टपणे सांगितले की, “प्रभाग क्रमांक ६, ५, ३ आणि २ मध्ये मतदारसंख्येत मोठी तफावत निर्माण झालेली आहे. काही ठिकाणी मतदारांचे नावच नाही, तर काही ठिकाणी मृत व्यक्तींची नावे अद्याप कायम आहेत. हा प्रकार अतिशय गंभीर असून, तात्काळ शहानिशा करून कारवाई व्हावी.”

नागरिकांचे ठाम मत आहे की,

“आगामी निवडणुकीत कोणताही ‘घोळ’ होऊ नये, कोणताही पात्र मतदार मतदानापासून वंचित राहू नये आणि पारदर्शक व न्याय्य निवडणूक प्रक्रिया पार पाडली जावी. हा आमचा संविधानिक हक्क आहे आणि प्रशासनाने त्याची पूर्ण दक्षता घ्यावी.”

अशा आक्रमक मागणीमुळे उपविभागीय कार्यालयात एकच खळबळ माजली आहे.

📞 एम.के.एम. न्यूज मराठीसाठी
📰 संजय वाघमारे, तालुका प्रतिनिधी, उमरखेड
📱 भ्रमणध्वनी : 9302601023